നക്ഷത്രബംഗ്ലാവ്

വഴിതെറ്റിയൊരു കുഞ്ഞുനക്ഷത്രത്തെ കരിമേഘം തന്‍റെ മുലകളില്‍ ചേര്‍ത്ത് വച്ചു

മേഘം മഴയായ്‌ പെയ്തപ്പോള്‍, പണ്ടൊരു പുഴ ഒഴുകിയ മണല്‍ പരപ്പിലേക്ക്

നക്ഷത്രം തെറിച്ച്‌ വീണു..

വീട് വെക്കാന്‍ കുഴിച്ച മണ്ണില്‍ നിന്ന് ഒരു കുഞ്ഞുനക്ഷത്രത്തിന്‍റെ തലയോട്ടി കിട്ടിയതുകൊണ്ട്

ഞാനെന്‍റെ വീടിനു പേരിട്ടു 'നക്ഷത്രബംഗ്ലാവ് '

വീട്

വീടിനു മഴയുടെ പേരിട്ടത് അമ്മയായിരുന്നു
അച്ഛനതുവിറ്റു കള്ളു കുടിച്ചു ..

വീടിനെ കുറിച്ച് ചോദിച്ചാല്‍ കാട്ടിത്തരാന്‍ ,
അച്ഛന്‍ ഗ്ലാസിലും അമ്മ കണ്ണിലും
മഴയെ ശേകരിച്ചു വെച്ചിരുന്നു ..